Ярҙамлыҡ һүҙҙәрҙең яҙылышы

А. 1. Йыйыу, бәйләү теркәүесе һәм көсәйтеү киҫәксәһе булып йөрөгән ла-лә, ҙа-ҙә, да-дә, та-тә айырым яҙыла; был киҫәксәләр, ялғау кеүек үк, сингармонизм законына буйһона, йәғни нәҙек һүҙҙән һуң нәҙек, ҡалын һүҙҙән һуң ҡалын була: һин дә мин, бар ҙа ал, эшләй ҙә ашай; Юлай ҙа, Шәрип тә килгән; тауышы ла сыҡмай, бөтәһе лә бында һ. б.
Иҫкәрмә: Ҡәнәғәтлекте белдергән әлдә һүҙендәге дә ҡушып яҙыла: әлдә килдең әле, әлдә ямғыр яуманы.

  1. Сикләү, конкретлау киҫәксәләре булып йөрөгән уҡ-үк, ғына-генә, ҡына-кенә шулай уҡ айырым яҙыла; был киҫәксәләр сингармонизм законына буйһоноп, нәҙек һүҙҙән һуң нәҙек, ҡалын һүҙҙән һуң ҡалын итеп яҙыла: алғас уҡ, әйтеп үк; ул ғына, һине генә, саҡ ҡына, өс кенә һ. б.
    Иҫкәрмә: 1) Түбәндәге һүҙҙәрҙә уҡ-үк ҡушып яҙыла: әйҙүк (түрҙән уҙ), берүк (әйтмә);
    2) Иркәләүҙе аңлатҡанда ғына-генә, ҡына-кенә ҡушып яҙыла: балағынам, күҙгенәм һ. б.
  2. Көсәйтеү, раҫлау киҫәксәһенең тулы формаһында һәр компонент үҙенән башҡа айырым яҙыла: күргән дә баһа, ямғыр ҙа баһа, эт тә баһа, асҡан да баһа, килә лә баһа, осло ла баһа; ҡыҫҡа формаһы ҡушып яҙыла: алған даһа, эшләй ҙәһә һ. б.
  3. Икән, иһә, ине ярҙамлыҡ ҡылымдары айырым яҙыла: бармы икән, бар икән; ул иһә, яҡшылыҡ иһә, йә иһә, ала ине, килер ине.
    Б. 1. Үтенеү, ялыныу киҫәксәләре булып йөрөгән һана-һәнә, сы-се, со-сө ҡушып яҙыла: барһана, әйтһәнә; бирсе, торсо, йөрөсө.
  4. Икеләнеү киҫәксәһе булып йөрөгән лыр-лер, ҙыр-ҙер, дыр-дер, тыр-тер ҡушып яҙыла: баралыр, күргәндер, эшләйҙер һ. б.
    Һорау киҫәксәһенән һуң килә торған ни алмашы айырым яҙыла: бирҙеме ни, беләме ни һ. б.